Ushindi Katika Vita Ya Kiroho na Mwl. Eng. Peniel Sarakikya

Bwana Yesu asifiwe milele.  
Mwaka 2018 nilisikia sauti ya Mungu ikinielekeza 
kuandika somo hili. Nilianza kuandika kama mfululizo 
makala gazetini.  
Baadaye nikazikusanya zile makala na kuandaa toleo la 
kwanza la kitabu hiki mwaka 2020 Julai. Na sasa, toleo hili 
la pili la mwaka 2024 ni matokeo ya kuboresha na 
kuondoa makosa ya uchapaji yaliyokuwepo kwenye 
toleo la kwanza.  
Maisha ya mwanadamu ni uwanda mapambano endelevu 
yasiyoisha. Inawezekana hata wewe ni shahidi, kwamba 
kuna wakati ulishindwa katika jambo ambalo 
ulijihakikishia ushindi. Jambo ambalo ulishindwa na 
hukuwa na maelezo ya kutosha kwanini ulishindwa.  
Kuna uwezekano kwamba ulishindwa kwa sababu ya vita 
inayokukabili katika ulimwengu wa roho. Isingekuwa ni 
hiyo vita, ungeshafanikiwa katika mambo mengi.  
Kushindwa kuelewa yanayoendelea katika ulimwengu 
wa roho ni sababu ya wengi kushindwa. Ushindi katika 
vita vya kiroho unategemea mambo makuu matatu.  
a. Kwanza, ni uelewa wako kuhusu pande mbili 
zinazopigania kuyadhibiti maisha yako.  
viii 
b. Pili ni kujua silaha za ushindi na matumizi yake 
sahihi.  
c. Na tatu, ni kujua kanuni mbali mbali za ushindi 
katika vita vya kiroho.  
Haya ndiyo mambo ambayo utajifunza kwa undani sana 
katika kitabu hiki, kwa kuwa hiki ni kitabu cha washindi. 
Ukitaka kuishi maisha ya ushindi duniani, jifunze jinsi 
shetani anavyomshambulia mwanadamu, kisha jifunze 
namna Mungu anavyotusaidia kumshinda. 
Chuki na hasira ya Shetani dhidi ya mwanadamu 
inalenga mambo makuu mawili.  
Kwanza kabisa, shetani anamshambulia mwanadamu ili 
kumzuia asiweze kumiliki na kutawala hapa duniani. Pili 
kumzuia mwanadamu asiweze kuurithi uzima wa milele 
alioandaliwa na Mungu.  
Usipokuwa tayari kulinda ulichonacho, kuna siku 
utalazimika kupigana ili kukomboa ulichonyang'anywa 
na shetani. Kinga ni bora kuliko tiba.  
Uwepo wa mateka, majeruhi na wasaliti katika vita vya 
kiroho ni kiashiria kingine cha namna ulimwengu wa 
roho unavyojaribu kuyadhibiti maisha ya mwanadamu. 
Vita vya kiroho ni vita endelevu. 
Hii ni sababu mojawapo ya kwanini Biblia imeonyesha 
silaha nyingi za kujilinda, na silaha moja ya kushambulia.  

Adui shetani hupambana na mwanadamu akitumia falme, 
mamlaka, wakuu wa giza na majeshi ya pepo wabaya 
katika ulimwengu wa roho.  
Shetani, malaika walioasi na pepo wachafu wana nguvu 
fulani ila hawana mamlaka ya kutawala dunia kwa kuwa 
hawana mwili wa damu na nyama. Ili kupata uhalali 
hutumia wanadamu na wanyama kufanya kazi zake.  
Mlango mkuu wanaotumia ni ujinga wa mwanadamu na 
uasi wa mwanadamu mbele za Mungu. Ushindi wa 
shetani unategemea ujinga wa mwanadamu wa 
kutokujua Neno la Mungu. 
Yapo mapambano matatu ambayo kama askari lazima 
ujiandae kukabiliana nayo. Vita kati ya roho yako na 
mwili wako. Vita kati yako na ulimwengu, kisha vita kati 
yako na shetani.  
Shetani hatakuacha upigane na mwili hadi umalize kabla 
hujaanza kupigana na ulimwengu na maadui wengine 
rohoni. Wakati roho yako inapigana na mwili wako 
ulimwengu utakushambulia.  
Wakati unapigana na mwili na ulimwengu kwa pamoja, 
shetani naye atakushambulia. Vita zote hizi tatu hutokea 
kwa wakati mmoja ndio maana huwezi na usitarajie 
kushinda bila msaada wa Roho Mtakatifu.  

Ukitaka kuwa shujaa wa Imani lazima utambue nafasi ya 
Roho Mtakatifu na umruhusu akusaidie mapiganoni. 
Hapo ndipo utashinda, naam, na zaidi ya kushinda. 
Yesu Kristo aliyefufuka hufunuliwa katika utukufu, nguvu, 
ushindi na utakatifu. Mungu amelikusudia kanisa kuwa 
lenye utukufu, nguvu, ushindi na utakatifu katika 
ulimwengu wa sasa na sio kanisa nyonge. 
Matumizi sahihi ya damu ya Yesu ndilo Pigo kuu na la 
mwisho katika pambano lolote la kiroho. Kuna nguvu kuu 
katika damu ya Yesu. Kuna Ukombozi katika damu ya 
Yesu (Efe 1:7).  
Kuna kibali cha kumkaribia Mungu katika damu ya Yesu 
(Ebr 10:19, Efe 2:13). Kuna uponyaji katika damu ya Yesu 
(Isa 53:5).  
Kuna ulinzi katika damu ya Yesu (Kut 12:13). Kuna 
mamlaka ya kumshinda shetani ndani ya damu ya Yesu 
(Ufu 12:11).  
Pigo la mwisho katika vita yoyote ya kiroho ni damu ya 
Yesu. Unapoitumia damu ya Yesu kwa usahihi 
HUTASHINDWA VITANI KAMWE.  
Kwa kuwa Mungu hapendi kuona unashindwa vitani, 
ameweka kitabu hiki mikononi mwako kikusaidie kuishi 
maisha ya ushindi.  
Ni maombi yangu kwa Mungu kwamba kupitia kitabu hiki 
utapata msaada wa kukutoa hapo ulipokwama. Ni shauku 

yangu kuona kitabu hiki kinakuweka karibu zaidi na Yesu 
Kristo na kumruhusu yeye awe Bwana na mwokozi wa 
maisha yako.  
Kula na ukue kiroho.  
Asifiwe Yesu kabisa.  
Mwl. Eng. Peniel S. Sarakikya 
Aprili, 2024